Nieuwsbericht -

Aktualmente FTAC ta hasiendo un “roadshow” pa Asosiashonnan di empresario na Kòrsou. E intenshon ta pa informá e Asosiashonnan di empresario i nan miembronan tokante e lei di kompetensia ku a drenta na vigor 1 di Sèptèmber 2017.

Alberto ‘Chos’ Romero, Presidente di FTAC, ta indiká ku: “durante e servisio di informashon nos ta bai splika ku palabrashonnan entre empresarionan ku ta limitá kompetensia òf ta hasi mal uso di poder ekonómiko ta perhudiká bienestar di e konsumidó, e sektor empresarial i kresementu ekonómiko. Ku sierto ehèmpelnan nos ta bai splika e kontenido di e reglanan nobo i kon empresanan por mantene nan mes na e reglanan aki den práktika.”

Lei di kompetensia ta prohibí ku dos òf mas komersiante, profesionalnan liber i kompanianan di gobièrnu hasi palabrashonnan ku ta limitá kompetensia. Por ehèmpel ta prohibí pa hasi palabrashon pa bende sierto produkto na un sierto preis, dividí merkadonan o hasi mal uso di poder ekonómiko riba merkado. Palabrashonnan òf desishon di Asosiashonnan di empresario ku ta limitá kompetensia tambe ta kontra di Lei di kompetensia. Ademas e lei ta preskribí ku sierto fushon o atkisishon tambe tin di wòrdu reportá na FTAC.

Alberto ‘Chos’ Romero, ta indiká ku: “ta importante ku empresanan, Asosiashonnan di empresario i nan konseheronan ta bon na altura di e reglanan nobo pa asina por adaptá nan mes boluntariamente. FTAC lo duna yudansa gustosamente kaminda mester.”

Violashon di e reglanan aki ta kastigabel pa lei. FTAC por imponé un enkargo mará na but, e but por subi yega te un máksimo di 10 porshento di e volúmen di benta anual total di e empresa.

Asosiashonnan ku te ainda no a reakshoná riba e invitashon di FTAC por traha un sita serka FTAC pa un presentashon. Pa mas informashon konsulta e wèpsait di FTAC na www.ftac.cw.