Nieuwsbericht -

Mas ku 1700 empresa i asosashonnan di empresario ta risibí e siman aki un karta di Fair Trade Authority Curaçao (FTAC). Den e karta aki FTAC ta splika ta kua ta e reglanan nobo pa kompetensia ku empresarionan mester bai mantené nan mes na dje entrante 1 sèptèmber. E reglanan nobo mester bai sòru pa empresanan bai kompetí di manera mas husta ku otro pa kai na agrado di e konsumidó. Violashon di e reglanan aki ta kastigabel pa lei.

Dia 1 sèptèmber e reglanan nobo pa kompetensia ta drenta na vigor. Pa prepará e empresanan na Kòrsou FTAC a skibi un karta den kua e ta splika e kontenido di e reglanan nobo i e konsekuensianan pa e empresa si e reglanan aki wòrdu violá. E reglanan nobo ta prohibí palabrashonnan ku ta limitá kompetensia entre empresanan. Pero FTAC a indiká tambe ku pa sierto tipo di  palabrashon ku ta limitá kompetensia tin e posibilidat pa risibí eksonerashon, basta e palabrashon su benefishinan pa e konsumidó ta mas grandi ku e desbentahanan di tal palabrashon. FTAC su portanan ta habrí pa empresanan ku kier mas splikashon enkuanto e reglanan nobo.

Señor Chos Romero, Presidente di FTAC, ta indiká ku: “e reglanan nobo ku ta ankrá den e Ordenansa enkuanto Kompetensia, ta dirigí riba halsa e bienestar di nos konsumidónan. Mas kompetensia ta sòru pa mihó preis, mihó servisio, mas kalidat i mas produkto inovativo. E konsumidó mester bai kuminsá e sinti e benefishinan aki den su pòtmòni”.

 

Bo tin pregunta? Tuma kontakto ku sr. Albert Scholten, Direktor di FTAC. Email: info@ftac.cw, number di telefòn: +5999 4610067.