Nieuwsbericht -

Fair Trade Authority Curacao (FTAC) a kuminsá ku su konsulta na komunidat tokante puntonan di atenshon i abuso den nos merkado ekonómiko. Pa e ronda di konsulta aki FTAC a traha un dokumento konsultativo. E dokumento aki a wòrdu publiká riba nos website (www.ftac.cw) i página di Facebook. Meta di e konsulta sosial aki ta pa haña informashon pa fiha nos agènda anual 2018.

FTAC kier haña feedback di un públiko amplio riba nos plannan preliminar. P’esei FTAC ya a hiba kombersashon ku algun stakeholder importante. Kámara di komersio (KvK), Asosashon di Empresarionan di Kòrsou (VBC), Fundashon pa Konsumidó i e sentralnan sindikal Central General Trahadónan di Corsow (CGTC) I Sentral Sindikal di Kòrsou (SSK-AVVC) a wòrdu invitá pa un promé enkuentro konsultativo di 5 di desèmber último.

Pero FTAC gustosamente kier tende opinion di otronan tambe. Den e dokumento konsultativo tin algun pregunta, riba kua FTAC kier risibí un reakshon. Gustosamente nos ta ekstendé un invitashon na un i tur pa hasi esaki. E reakshonnan ku nos risibí di nos komunidat ta forma un stap importante den e formashon di nos agènda anual 2018.

Interesadonan por duna nan reakshon te dia 31 desèmber 2017 via di info@ftac.cw. E agènda 2018 di FTAC ta wòrdu fiha definitivamente na prinsipio di aña 2018 i tambe lo wòrdu publiká riba nos website.