Nieuwsbericht -

Fair Trade Authority Curaçao (FTAC) tin kompetensia den sektor finansiero i di konstrukshon komo un punto di preokupashon. Esei ta bini dilanti den e agènda di FTAC pa aña 2018 ku a keda publiká awe riba nan wèpsait www.ftac.cw. Den e agènda aki FTAC ta trese dilanti ku den 2018 nan lo pone atenshon spesialmente riba e sektor finansiero I sektor di konstrukshon. Análisis hasi dor di FTAC i un ronda di konsulta a mustra ku den e sektornan menshoná tin sospecho di aktonan ku ta limitá kompetensia. P’esei FTAC ta bai hasi investigashon den e sektornan aki.

Presidente di FTAC Alberto (Chos) Romero: “ta importante pa haña un bista di ki manera i kon kompetensia por wòrdu mehora den e sektor finansiero i den e sektor di konstrukshon. Tur konsumidó tin direktamente o indirektamente di aber ku e dos sektornan menshoná. Pa e motibu aki ta importante pa posibel problemanan di kompetensia ku ta okashoná kostonan haltu den e dos sektornan aki wòrdu eliminá”.

FTAC ta bai investigá kon e sektor finansiero i di konstrukshon ta funshoná i unda e rísikonan pa ku kompetensia inhustu ta sinta. Tambe FTAC lo por hasi investigashon mas profundo si tin siñalnan di posibel violashon di e Ordenansa enkuanto Kompetensia. Kaminda FTAC konstatá violashon di e Ordenansa, FTAC lo aktua pa terminá esaki i si ta nesesario imponé un but. Butnan por subi yega te un máksimo di 10 porshento di e volúmen di benta anual total di e empresa.

E agènda di 2018 tambe ta indiká ku FTAC lo kontinuá ku e trayekto di duna informashon i hasi investigashon tokante outo regulashon den asosiashonnan di empresario. Por último FTAC ta planiá pa duna konseho na Gobièrnu riba proyektonan di leinan i regulashon den preparashon o eksistente ku por limitá kompetensia den sierto merkadonan.

Mas kompetensia ta sòru pa preisnan mas abou, mas inovashon, mihó kalidat i mihó servisio. Esaki ta na benefisio di un i tur.

FTAC ta hasi un apelashon na tur persona ku tin informashon òf siñal di posibel violashon di e reglanan di kompetensia, manera palabrashon di preis, repartishon di merkado i mal uso di poder ekonómiko pa mèldu esaki na FTAC. Tin un formulario pa hasi entrega di keho. Siñalnan di posibel violashon por wòrdu entregá anónimo tambe.

E agènda pa 2018 di FTAC ta riba akie wèpsait di FTAC www.ftac.cw.

Bo ke mas informashon? Tuma kontakto ku sr. Albert Scholten, direktor di FTAC. E-mail: info@ftac.cw, telefòn: +5999 461 00 67.