Fair Trade Authority Curacao (FTAC) a kondusí un investigashon riba kordinashon di komportashon den merkado entre Curaçao Ports Authority (CPA) i operadornan di turnan turístiko ku ta ofresé paseo post pago for di Mega Pier.
E resultadonan di e investigashon aki ta poné den e proyekto di desishon: “Ontwerpbeschikking inzake collectieve bepaling verkoopprijzen toeristische rondritten Mega Pier door CPA en Touroperators ” fechá 29 yanüari 2021.
Den e proyekto di desishon FTAC ta yega na e konklushon ku e palabrashon entre CPA i operadornan post pago pa apliká un tarifa mínimo di $20 pa turnan turístiko post pago ku ta sali for di Mega Pier, ta kalifiká komo un palabrashon en pugna ku e prohibishon di kartel konforme artíkulo 3.1 miembro 2 sub a di e Ordenansa Nashonal enkuanto Kompetensia.
Pa e tipo di palabrashonnan aki konforme artíkulo 3.5 di e Ordenansa Nashonal enkuanto Kompetensia no tin eksonerashon.
FTAC ta apuntá CPA, e asosiashonnan di operadornan di tur (CATO i CTOA) I kada operador di tur post pago for di Mega Pier individualmente komo infraktor di e prohibishon di kartel I FTAC ta konsiderá konforme artíkulo 7.1 miembro 1 sub a pa imponé un instrukshon obligatorio pa kumpli ku e ordenansa nashonal komo sanshon pa e infrakshon aki.
Den e Ordenansa Nashonal enkuanto Kompetensia ta reglá den artíkulo 7.1, miembro 2 jo. artíkulo 8.1 te ku 8.5 ku promé FTAC por imponé un instrukshon obligatorio, FTAC mester pone e proyekto di desishon konserniente pa un periodo di 6 siman pa inspekshon na kantor di FTAC pa tur interesado. Den e artíkulonan aki tambe ta reglá ku personanan direktamente konserní, durante e periodo aki, por ekspresá nan punto di bista over di e proyekto di desishon sea por eskrito òf verbalmente serka FTAC. Tur e dokumentonan relashoná ku rasonablemente ta nesesario pa husga e proyekto di desishon tambe ta disponibel pa personanan direktamente konserní na kantor di FTAC.
Pa medio di e anunsio aki FTAC ta partisipá konforme artíkulo 8.2 di e Ordenansa enkuanto Kompetensia ku e proyekto di desishon ariba menshoná despues di 5 dia di e publikashon aki den Landscourant lo ta disponibel pa inspekshon na kantor di FTAC.
Despues di e periodo di inspekshon aki FTAC lo aprobá e desishon definitivo. Partidonan direktamente konserní por hasi opheshon i bai den apelashon kontra di e desishon aki.
Pa mas informashon òf pa traha un sita pa inspekshon di e proyekto di desishon na kantor di FTAC por tuma kontakto ku FTAC via e number di telefòn +5999 461 0067 òf via info@ftac.cw.