E Asosiashon di Arkitekto i Ingenieronan SAIA (nòmber nobo: Dutch Caribbean Architects and Engineers, DCAE), den konsulta ku FTAC a adaptá su kondishonnan di kontrato (“ARNA”) na e reglanan nobo di kompetensia. E kondishonnan di ingenieronan tambe a wòrdu integrá den e mesun areglo.
E adaptashon di e areglo ku ta konserní e relashon legal entre arkitektonan i nan klientenan tabata nesesario pa e areglo por kumpli ku e reglanan den e Ordenansa enkuanto Kompetensia. E areglo bieu di 1978 tabata kontené tarifanan kolektivo fiho, determiná pa e asosiashon. Den e Ordenansa enkuanto Kompetensia esaki no ta posibel mas. E Ordenansa ta prohibí pa asosiashon di empresarionan fiha preisnan kolektivamente. Esaki ta konta tambe pa e areglo di ingenieronan i nan klientela. Bou di e reglanan nobo, arkitekto i ingenieronan mes por fiha nan tarifanan individualmente. Esaki ta trese kuné, ku tin mas kompetensia i tambe preisnan mas abou pa e klientenan. Ademas e areglo nobo tambe a wòrdu modernisá.
Alberto “Chos” Romero: “SAIA a yega den bon entendimentu ku FTAC na e desishon pa adaptá su kondishonnan di kontrato na e reglanan di kompetensia. Esaki ta bon pa kompetensia, bon pa e klientenan I tambe bon pa e konsumidó. Nos ta hasi un yamada na tur otro asosiashon pa nan tambe adaptá nan kondishonnan di kontrato òf otro reglamentunan pa nan kumpli ke e Ordenansa enkuantu Kompetensia. Si ta nesesario nan por pidi konseho na FTAC”.
Miembronan di SAIA di awor en adelante lo mester hasi uso di e areglo nobo ku e nòmber “Algemene Regeling voor Opdrachtgevers en Adviseurs 2018 (“AROA”). FTAC lo duna atenshon na e areglo nobo aki den nos aktividatnan informativo na Gobièrnu i empresarionan.
Arkitekto I ingenieronan ku sigui hasi uso di e areglo bieu, ta aktua kontra di e Ordenansa enkuantu Kompetensia. FTAC lo keda vigilá kumplimentu ku e palabrashon hasí ku SAIA i lo imponé un multa den kaso di inkumplimentu.
Por haña e desishon kompleto di FTAC riba link aki.
Siñalnan tokante di violashon di e Ordenansa enkuantu Kompetensia, por wòrdu mando na info@ftac.cw òf por pasa na kantor di FTAC na Pietermaai 6.
Bo ke mas informashon? Tuma kontakto ku info@ftac.cw, telefòn: +5999 461 00 67