Despues di a konsulta ku FTAC, Curaçao Oil (Curoil) N.V a manda un karta na tur klientenan di low sulfur diesel (LSD). Den e karta aki Curoil ta splika ku nan lo no stòp e suministrashon di e produktonan di petrolio si un kliente di LSD kumpra serka un otro suministradó, tanten ku prevení ku e produktonan no wòrdu mesklá ku e produktonan di Curoil.
Na fin di aña 2018 a yega na atenshon di FTAC un karta ku fecha di 17 desèmber 2018, kual Curoil a manda pa su klientenan. Den e karta aki Curoil ta indiká ku e lo stòp e suministro di produktonan mesora si un kliente kumpra produktonan serka un tersera parti. Klientenan di LSD serka Curoil ta pòmpnan di gasolin pero tambe negoshinan di industria i establesimentunan di horeca ku un delco/generator.
Despues di a konsulta ku FTAC, Curoil a disidí di duna mas informashon pa e klientenan pa medio di un karta. Den e karta aki Curoil ta indiká ku nan lo no stòp e suministro di produkto mesora si nan kumpra serka un otro suministradó. Curoil ta eksigí ku e kliente mester sòru pa produktonan ku wòrdu kumpra serka Curoil no wòrdu meskla ku produktonan di otro suministradónan. E kliente por hasi esaki por ehèmpel dor di warda e LSD den un depósito separá.
Klientenan ku ta di opinion ku Curoil ta ninga suministro sin ningun base, por tuma kontakto ku FTAC. FTAC lo monitoria esaki.
Prohibishon di mal uso di poder ekonómiko (‘misbruik machtspositie’)
E lei di prohibishon di mal uso di posishon di poder ta na vigor for di 1 sèptèmber 2017 na Kòrsou. Esaki ta nifiká ku sierto komportashon di empresanan ku un posishon fuerte riba e merkado ta prohibí. Di tin un posishon fuerte riba merkado no ta prohibí enkuanto di e Ordenansa Nashonal enkuanto Kompetensia, pero pa hasi mal uso di esaki si ta prohibí. Mal uso di posishon di poder por originá for di diferente forma di e kondukta di e merkado, manera:
- kobra preisnan ekstremadamente haltu;
- mantené kondishonnan di entrega irashonal;
- obligá klientenan pa kumpra un produkto kombiná ku un otro (‘koppelverkoop’); o
- nenga klientenan suministro di sierto produkto o servisio (‘leveringsweigering’).
E konsulta entre FTAC i Curoil aki riba menshoná a tuma lugá dor di nenga klientenan suministro di sierto produkto o servisio.