Dr. mr. Gerard Bakker a tuma despedida di Fair Trade Authority Curaçao (FTAC) riba 6 di novèmber. Señor Bakker a forma parti di e bestür di e outoridat di kompetensia for di su fundashon na aprel 2017. Entretantu, e a kompletá su término di mandato maksimal. Un grupo di dignatario i stakeholder a asistí na e resepshon di despedida.
Pa e okashon aki, señor Bakker a tene un diskurso ku a hiba komo título: “Nos tin futuro den nos mes man”. Den su diskurso, e a mira bèk riba e reto grandi di konstruí un institushon manera FTAC for di fundeshi, i tambe a reflehá riba e logro i kresementu ku FTAC tabatin durante e último aña nan. Sin embargo, e enfoke di su diskurso tabata riba futuro i riba e kontribushon balioso ku FTAC por duna na desaroyo ekonómiko di Kòrsou, na su ròl komo “marktmeester”, ku ta supervisá esnan ku ta ofresé produkto i servisio, pa asina garantisá merkadonan ku ta funshoná bon.
Señor Bakker a drenta den kombersashon ku e invitadonan presente tokante e ròl di FTAC den un mundu ku ta kambia rápido, kaminda outoridatnan di supervishon ta topa konstantemente ku reto nobo. Por ehèmpel, Internèt a tuma un lugá ainda mas importante den ekonomia, i presisamente pa e posishon ekonómiko spesífiko di Kòrsou ta hasi protekshon di inovashon esensial. Señor Bakker a drenta den detaye riba preguntanan manera: kiko FTAC a hasi pa protehá empresanan nobo den merkado? Ki posibilidat i outoridat FTAC tin? Kua ta e balor di kolaborashon pa e organisashon, i ku kua instansia por sigui fortifiká e laso di kooperashon? Pero tambe: kiko e obligashon di duna informashon i di kolaborá ku FTAC ta nifiká presisamente?
Señor Bakker a mustra tambe algun perspektiva pa futuro. E ekonomia i sosiedat ta sigui desaroyá na un ritmo rápido. Por ehèmpel, mester mas protekshon pa konsumidó den forma di un outoridat pa konsumidó komo parti di FTAC? I un areglo di klemensia por ta un instrumento útil FTAC?
Señor Bakker ta spera ku e reflekshonnan aki e a logra transmití su eksperensia den un manera inspirante.
“Ku partida di Gerard Bakker, FTAC ta tuma despedida di un miembro di bestür di promé ora. For di su fundashon, e a kontribuí ku su konosementu, vishon i integridat na e desaroyo di nos trabou i na fortalesé e posishon di FTAC den nos sosiedat. Su kompromiso i bista krítiko a enrikesé nos bestür i a duna direkshon den un fase kaminda hopi fundamentu a wòrdu pone. Nos ta masha agradesí pa esaki i nos ta dese’é hopi éksito i plaser den su futuro aktividatnan”, segun señora Miroslava Wedervoort, presidente di FTAC.