E asosiashon di dòkternan di kas di Kòrsou, CHV, tabatin e intenshon pa kolektivamente subi nan tarifa pa pashèntnan ku un seguro priva. E palabrashon aki a wòrdu hala aden despues di intervenshon di FTAC.
Dòkternan di kas ku ta afiliá na CHV ta ofresé kuido na pashèntnan ku un seguro básiko serka SVB i pashèntnan ku un seguro priva serka un kompania di seguro. E tarifanan pa pashèntnan ku seguro di SVB ta regulá, segun palabrashonnan entre CHV, SVB i Gobièrnu.
Te ku 2015 e tarifanan pa dòkternan di kas i spesialista pa seguro priva tambe tabata regulá den e dekreto (PB 1986, no 20). For di 2015 e dekreto a wòrdu terminá. Esei ta nifiká ku dòkternan di kas ta liber pa individualmente stipulá nan mes tarifanan pa pashèntnan ku un seguro priva. Promé di Sèptèmber 2017 e prohibishonnan den e Ordenansa Nashonal enkuanto Kompetensia a drenta na vigor. Esaki ta nifiká ku bou di e prohibishonnan aki dòkternan di kas tampoko no ta permití pa kolektivamente hasi palabrashon tokante preis o tarifa pa nan servisio.
Curacao and Bonaire Insurance Asossiation (CBIA) a entregá un keho na FTAC kaminda nan ta mustra FTAC riba e intenshon di e asosiashon di dòkternan di kas pa subi e tarifanan pa pashèntnan ku un seguro priva kolektivamente. Despues di un kombersashon ku FTAC, CHV a disidí di kanselá e palabrashon aki. FTAC a yega na e konklushon ku e desishon di CHV pa subi e tarifanan kolektivamente ta kontra di e reglanan di kompetensia. FTAC a disidí di konkluí e kaso di manera informal. FTAC a konsiderá ku un medida manera un multa na e momento aki no ta nesesario. FTAC lo sigui vigilá kumplimentu ku e palabrashon entre FTAC i CHV. Den kaso ku CHV no kumpli ku esaki FTAC lo por tuma medidanan i imponé un multa.
Alberto “Chos” Romero: presidente di FTAC: “E reglanan di kompetensia ta wòrdu apliká riba tur negoshi, profeshonnan liber I asosiashonnan di empresarionan ku ta aktivo aki na Kòrsou. FTAC no ta hasi distinshon. Un desishon pa fiha preisnan kolektivo dor di un asosiashon di empresario ta prohibí bou di e lei di kompetensia si no tin eksepshonnan hasí den lei. Den e kaso aki gobièrnu a hala e regulashon di tarifanan di dòkternan di kas pa pashèntnan ku seguro priva aden. FTAC ta supervisá violashon di e reglanan di kompetensia, sigur si haña un keho. FTAC ta hasi un apelashon na tur asosiashon di empresario pa stòp ku e komportashon aki I si tin duda pidi konseho na FTAC”.
Por haña e desishon kompleto di FTAC riba nos wèpsait: www.ftac.cw.
FTAC ta supervisá e reglanan di kompetensia hustu ankrá den e Ordenansa Nashonal enkuanto Kompetensia ku ta na vigor for di sèptèmber 2017, en partikular e prohibishonnan pa formashon di kartel i mal uso di poder ekonómiko. Prohibishon di kartel ta enserá ku negoshinan ku ta kompetí ku otro den mes un merkado no tin mag di hasi palabrashonnan tokante di preis di benta I asosiashonnan di empresario no tin mag di tuma desishonnan pa fiha preisnan kolektivo. E tipo di palabrashonnan aki ta resultá den preisnan haltu pa e konsumidó. FTAC no ta fiha preis. Negoshinan mes tin mag di fiha nan preisnan den merkadonan ku no ta wòrdu regulá dor di Gobièrnu.
Siñalnan tokante di violashon di Ordenansa Nashonal enkuanto Kompetensia, por wòrdu manda na info@ftac.cw òf por pasa na kantor di FTAC na Pietermaai 6.