Fair Trade Authority Curacao (FTAC) den koperashon ku Fundashon pa Konsumidó (FpK) a start un investigashon riba tarifa i interesnan ku bankonan lokal ta apliká pa produktonan bankario privá. Meta ta pa kompará e tarifa i interesnan di diferente bankonan ku otro i hasi komprendibel pa e konsumidó. E resultadonan di e investigashon aki lo wòrdu publiká den un rapòrt públiko.
Mas kompetensia entre bankonan ta un área di prioridat pa FTAC e aña aki. E investigashon di merkado aki ta kuadra den e prioridat aki, paso si e konsumidó por kompará e tarifa i interesnan di bankonan ku otro di manera simpel promé ku e hasi un eskoho, esaki ta stimulá kompetensia. Tarifa i interesnan di bankonan mester ta transparente i komprendibel pa e konsumidó.
FTAC lo usa e resultadonan di e investigashon aki tambe komo fuente di informashon den kuadro di nan supervishon pa ku kumplimentu ku e Ordenansa Nashonal enkuanto Kompetensia den e sektor finansiero. Presidente di FTAC – Alberto ‘Chos’ Romero: “E konsumidó ta hasi uso praktikamente tur dia di produktonan bankario. P’esei ta importante pa siñalá posibel problemanan di kompetensia ku por kondusí na gastunan haltu pa e konsumidó. Un investigashon di merkado ta pas den e strategia aki”.
Fundashon pa Konsumidó lo usa e resultadonan di e investigashon pa informá e konsumidó mas mihó tokante di e diferensia den tarifa i interesnan entre bankonan. Direktor di FpK, Marc Marshall: “Fundashon pa Konsumidó ta aspirá pa tin un merkado pa konsumidó transparente i e investigashon aki lo kontribuí na esaki. E aspirashon di Fundashon pa Konsumidó ta pa hasi mas di e tipo di investigashonnan aki huntu ku entidatnan di supervishon pa asina stimulá un merkado ekonómiko liber pa Kòrsou.”
E siguiente produktonan bankario ta forma parti di e investigashon: kuenta koriente, kuenta di spar, tarhetanan di krédito, money cards, fiansa personal i fiansa pa outo. Nuebe institushon bankario lokal a risibí resientemente un karta di invitashon pa partisipá na e investigashon.
E investigashon konhunto aki ta resultado for di e akuerdo di koperashon ku FTAC a firma ku FpK kabamentu di aña pasá. E investigashon ta wòrdu ehekutá pa RE-Quest Research & Consultancy.
Pa mas informashon tokante di e komunikado di prensa aki, por tuma kontakto ku sr. Jean-François Dictus (FTAC) na number +(599-9) 461-0067 of sr. Marc Marshall na number +(599-9) 462-666.