Dia 3 novèmber 2020 e Presidente di Fair Trade Authority Curacao (FTAC), señora Miroslava Wedervoort i Minister di Asuntunan Ekonómiko, señor Steven Martina a firma un akuerdo di maneho pa e periodo 2020 – 2023.
FTAC ta e outoridat independiente asigná komo supervisor di Ordenansa Nashonal enkuanto Kompetensia. E Ordenansa Nashonal aki ta kai bou di responsabilidat di Minister di Asuntunan Ekonómiko. E Minister ta responsabel pa maneho di kompetensia I e realisashon di e metanan formulá den esaki.
Den e akuerdo di maneho aki e Minister i FTAC ta duna kontenido mas detayá na nan relashon, kamindanan ku esaki no ta regla den lei. E akuerdo aki ta brinda e Minister instrumentonan pa garantisá ku FTAC ta hasi uso di e medionan na su disposishon i su outoridat konforme reglanan di bon gobernashon i di kontabilidat pero tambe ta salbaguardiá e outonomia di FTAC pa por ehersé su tareanan i outoridat di manera independiente i liber di interferensia.
Na 2017 na momento di inougurashon di FTAC a firma e promé akuerdo di maneho. E akuerdo a terminá e aña aki. Despues ku e Ministerio I FTAC a hasi un evaluashon di e periodo ku a transkurí a redaktá un akuerdo nobo ku awor ta balido pa e próksimo 3 añanan.
Bo ke mas informashon? Tuma kontakto ku info@ftac.cw, telefòn: +5999 461 00 67.
