Anton van der Schans lo bira e direktor nobo di Fair Trade Authority Curaçao (FTAC). Dia 1 di òktober 2018, despues di un periodo den kua el a profundisá den kontenido di e funshon nobo, e ta sigui Albert Scholten den e funshon di direktor di FTAC. Señor Van der Schans ta e antiguo Abogado General di Ministerio Públiko na Willemstad i e tin amplio eksperensia den investigashon hudisial.
Alberto ‘Chos’ Romero, presidente di FTAC: “ku partida di Albert Scholten, FTAC ta pèrdè un direktor desidido i ku kapasidat pa aktua, kende a nifiká hopi pa FTAC. Despues ku a instituí FTAC, e organisashon a krese bira un outoridat di kompetensia ku kua entretantu komunidat ta tene debido kuenta. Ku esaki e tarea di Albert Scholten a keda konkluí. Nos ta agradesido pa e tantísimo trabou ku el a desplegá.”
FTAC a drenta den un fase nobo, den kua lo bai sigui ekstendé supervishon riba kompetensia i edifiká su reputashon di outoridat di supervishon. A nombra Anton van der Schans despues di un prosedimentu di selekshon pisá, manera e Ordenansa Nashonal enkuanto Kompetensia ta preskribí. Entre otro a realisá den e prosedimentu di selekshon un evaluashon di abilidatnan ehekutivo (“executive assessment”) i un investigashon independiente di integridat.
Alberto ‘Chos’ Romero: “nos ta sumamente kontentu ku Anton van der Schans den su kalidat di direktor nobo ke guia e fase nobo akí di FTAC. E ta un hurista kompetente, ku un eksperensia ekstraordinario, kende ta bon na altura di loke ta biba den komunidat di Kòrsou. Danki na su 12 aña di eksperensia komo Abogado General na Ministerio Públiko e ta partikularmente apto pa e tarea nobo.”
Wilt u naar aanleiding van dit nieuwsbericht meer weten? Neem dan contact op met de FTAC. Email: info@ftac.cw, telefoon: +5999 461 00 67