Fair Trade Authority Curaçao (FTAC) a duna sinku kompania but riba 13 di desèmber 2024 pa aktua kontra e obligashon di koperashon manera menshoná den artíkulo 6.2, insiso 5 di e Ordenansa nashonal enkuanto kompetensia.
E kompanianan ku a haña but ta:
- Mangusa Supermarket B.V.
- Arco Iris Supermarket N.V.
- Zhao’s Arti’s Supermarket B.V.
- New California Supermarket B.V.
- Sure Minimarket B.V.
FTAC a tuma e desishon dia 13 di desèmber 2024 pa imponé butnan ku ta varia entre NAf. 270.000,- i NAf. 450.000 riba e kompanianan.
FTAC a kuminsá un investigashon despues di risibí un señal di Fundashon pa Konsumidó (FpK) na aña 2022 tokante posibel palabrashonnan di preis prohibí pa sierto produktonan di kòfi. Durante nan kompilashon periódiko di preis, FpK a nota ku vários bendedó (toko, minimarket i supermerkado) ta kobra e mesun preis pa un kantidat di produkto di kòfi. Konsekuentemente FTAC a hasi un análisis mas a fondo di e merkado di e produktonan di kòfi aki den kuadro di supervishon ku kumplimentu ku e Ordenansa nashonal enkuanto kompetensia.
Pa motibu di e resultadonan di e análisis, FTAC a manda un petishon di informashon pa binti (20) diferente kompania ku ta bende e produktonan di kòfi aki riba 1 di ougùstùs 2023, den kuadro di supervishon ku kumplimentu ku e Ordenansa nashonal enkuanto kompetensia. Diessinku (15) bendedó a koperá ku e petishon di informashon di FTAC, dunando e informashon pidí denter di e plaso di tempu suministrá.
FTAC ta responsabel pa supervisá kumplimentu ku e Ordenansa nashonal enkuanto kompetensia. Den kuadro di e tarea aki, FTAC ta outorisá pa eksigí informashon. Di akuerdo ku artíkulo 6.2 insiso 5 di e Ordenansa nashonal enkuanto kompetensia, tur hende ta obligá pa koperá. Di akuerdo ku artíkulo 7.3 di e Ordenansa nashonal enkuanto Kompetensia, FTAC por imponé un but si e koperashon aki no sosodé.
E sinku kompanianan ku a haña but, apesar di diferente rekordatorio di FTAC, no a duna e informashon pidí òf solamente a duna informashon despues ku FTAC a inisiá un investigashon pa violashon di e obligashon di koperashon, manera menshoná den artíkulo 6.2 insiso 5 di e Ordenansa nashonal enkuanto kompetensia.
E resultadonan di e investigashon riba e violashon di e obligashon di koperashon a keda registrá den sinku rapòrt separá. Den e sinku rapòrtnan, FTAC ta konkluí ku e kompania konserní a violá e obligashon di koperashon. Konforme artíkulo 7.11 insiso 3 di e Ordenansa nashonal enkuanto kompetensia, a duna e sinku (5) kompanianan e oportunidat pa trese nan punto di bista riba e rapòrt dilanti. Tres (3) kompania a hasi uso di e opshon aki. E puntonan di bista aki a wòrdu tumá den konsiderashon na momento ku FTAC a tuma e desishon pa pone un but.
FTAC a disidí di imponé un but riba e sinku (5) kompanianan di akuerdo ku artíkulo 7.3 di e Ordenansa nashonal enkuanto kompetensia paso no a koperá ku un petishon pa informashon. E montante di e but ta basá riba e regla di maneho implementá pa FTAC riba 6 di aprel 2020 “Maneho pa imposishon di butnan atministrativo di FTAC (Boetebeleid FTAC).” E regla di maneho aki, i tambe e sinku (5) desishonnan tumá, ta riba e wèpsait di FTAC.
E kompanianan konserní ainda por entregá un opheshon kontra di e desishonnan serka FTAC òf hasi un apelashon na Korte di Promé Instansia di Kòrsou. Mester hasi esaki denter di seis (6) siman despues di e dia riba kua e desishonnan a keda publiká den Landscourant
Tepnan tokante posibel violashon di reglanan di kompetensia por wòrdu di mèldu na FTAC via info@ftac.cw òf dor di bishitá ofisina di FTAC na Pietermaai 6.
Bo ke sa mas tokante e komunikado aki? Porfabor tuma kontakto ku info@ftac.cw of telefòn: +5999 461 00 67.