Fair Trade Authority Curaçao (FTAC) a publiká su agènda 2020-2021 riba su wèpsait. Den e agènda FTAC ta indiká kua ta e temanan ku e periodo benidero e ta bai fiha atenshon riba dje, banda di su obligashonnan legal regular.
E último añanan eksperensia a mustra ku investigashonnan inisiá mester mas di un aña pa nan kristalisá. Pa e motibu aki FTAC a disidí pa bai traha ku un agènda bienal.
Na 2018 FTAC a apuntá e sektor finansiero komo un sektor di prioridat i a keda mantené enfoke riba esaki. Na 2019 FTAC den koperashon ku Fundashon pa Konsumidó a realisá un investigashon di tarifanan bankario. E rapòrt di e investigashon ta brinda puntonan di referensia pa kontinuá ku mas investigashon. Pa e motibu aki e sektor finansiero ta permanesé un sektor di prioridat.
FTAC ta bai realisá tambe un investigashon di e merkado di komestibel pa haña un mihó bista di e diferente segmentonan den e sektor, e funshonamentu di e merkado, e grado di kompetensia i lei i regulashon relevante. Di e manera aki FTAC lo por haña un bista riba e kousanan tras di e desaroyo preis den e sektor aki.
Banda di su tareanan regular FTAC a invertí delaster añanan hopi den informashon pa asina un públiko grandi por sera konosí ku e Ordenansa enkuanto Kompetensia. Esaki a tuma lugá den forma di guia na empresarionan i asosashon di empresarionan i informashon via programanan radio i televishon. Pa 2020-2021 FTAC lo kontinuá mes intenso i a formulá un plan di komunikashon. E dos temanan ku lo bai haña atenshon speshal ta “kolaborashon entre empresa”: kiko por i kiko no por den kuadro di Ordenansa enkuanto Kompetensia i e obligashon pa mèldu konsentrashon konforme e Ordenansa enkuanto Kompetensia
Den kombersashon ku Minister di desaroyo ekonómiko na 2019 FTAC a ekspresá e intenshon pa hasi un asina yamá “competition assessments”. Den konsulta ku e ministerio a palabrá ku den 2020 lo investigá algun tema kaminda lei i regulashon tin influensia riba e funshonamentu di merkado liber.
Den 2020-2021 FTAC lo intensifiká su strategia di mantenshon. Kaminda na 2019 e enfoke tabata mas riba supervishon, di awor en adelante FTAC lo bai apliká un multa hopi mas lihé den kaso di infrakshon grave.
E agènda di FTAC ta basa riba opservashon, aktividatnan i prioridatnan di e último añanan. Normalmente FTAC ta konsulta stakeholders promé publiká e agènda. A konsekuensia di e brote di COVID-19 esaki no por a tuma lugá den 2020. Si ta nesesario, si FTAC risibí señalnan for di e sektor ekonómiko a konsekuensia di COVID-19 i rekuperashon ekonómiko, FTAC lo por adaptá su prioridatnan.
FTAC ta hasi un yamada na tur ku por tin tep o señal di violashon di e lei di kompetensia manera palabrashon di preis, repartishon di merkado o mal uso di poder ekonómiko pa mèldu esaki na FTAC. Por hasi uso di e formulario riba wèpsait di FTAC. Por entrega un tep/señal di manera anónimo tambe.
Bo ke mas informashon? Tuma kontakto na info@ftac.cw òf telefòn: +5999 461 00 67