Fair Trade Authority Curaçao (FTAC) ta e outoridat di kompetensia ku ta supervisá kumplimentu ku e Ordenansa Nashonal enkuanto Kompetensia, ku for di 1 sèptèmber 2017 ta na vigor. FTAC ta kontrolá kumplimentu ku e prohibishon di formashon di kartel, e prohibishon di mal uso di poder ekonómiko I e obligashon pa mèldu konsentrashon.
Pa kumpli ku e tarea aki FTAC tin outoridat pa hasi investigashon i pa sanshoná violashon di e reglanan. Pero FTAC tin e tarea tambe pa duna informashon i konseho na empresanan, pa sòru pa esakinan mantené nan mes na e reglanan (nobo) di kompetensia.
For di momento ku e Ordenansa Nashonal a drenta na vigor na 2017 FTAC a dediká hopi tempu na duna informashon na empresanan, konseheronan I organisashon di empresarionan. Esaki pa medio di presentashonnan na midi na gruponan i/o empresanan individual, Webinars, foyetonan den nos tres idiomanan ofisial i via di nos wèpsait i presensia riba e plataformanan di media sosial.
Awor FTAC ta dal un siguiente paso den su esfuersonan pa informá dor di lansa un serie di video informativo animá. Na e momento aki e promé dos videonan ta riba e wèpsait di FTAC. Ku e videonan animá aki FTAC kier informá un públiko mas amplio tokante su tareanan i outoridat. Den un video ta splika di manera simpel i aksesibel e kontenido di e Ordenansa Nashonal enkuanto Kompetensia i e tareanan di FTAC i den e otro video ta splika e prohibishon di formashon di kartel.
FTAC ta invitá bo pa wak e videonan aki bou: