Fair Trade Authority Curaçao (FTAC) a publiká awe su agènda anual 2019 riba su wèpsait. Den e agènda aki FTAC ta indiká ku pa 2019 e lo mantené su enfoke riba e sektornan finansiero i di konstrukshon. Den 2018 FTAC a identifiká e dos sektornan aki komo sektor di prioridat.
Presidente di FTAC Alberto (Chos) Romero: “den 2018 FTAC a realisá diferente investigashon den e dos sektornan aki i a duna guia na asosiashonnan di empresa i empresarionan. Ta asina ku FTAC a publiká un informe konsultativo tokante regulashon di preis di asfalt i tambe a determiná den un desishon un violashon di reglanan di kompetensia dor di e asosiashon di arkitekto i ingenieronan. FTAC a investigá tambe algun señal tokante posibel preisnan eksesivo i benta konektá. Pero mas investigashon den e sektornan aki ta nesesario. Ta dos sektor importante ku tur siudadano direktamente o indirektamente tin di aber kuné”.
Den 2019 FTAC lo kontinuá ku duna informashon di manera intensivo, den forma di guia na asosiashonnan di empresa i empresarionan, partisipashon na programanan di radio i televishon i den koperashon ku stakeholders organisá kurso i tayernan. E aserkamentu aki a duna fruta den 2018. Mas i mas e siudadano ta haña su kaminda pa yega na FTAC. Esaki ta nifiká ku e agènda di FTAC tambe lo wòrdu influensia den forma kresiente pa e kehonan i siñalnan ku FTAC lo bai risibí den transkurso di e aña aki.
Pa loke ta trata petishon di konseho i/o konsulta dor di gobièrnu, FTAC ta spera di lo tin un ròl den e implementashon di e plan “Groeistrategie Curaçao, Integraal en Samen” di gobièrnu. E espektativa ta ku konforme e lokual a keda deskribí den e plan “Groeistrategie” ku gobièrnu lo aserka FTAC pa duna konseho tokante medidanan nesesario pa eliminá opstákulonan ku ta impedí un kompetensia sano den e merkado di servisionan bankario.
Den 2019 FTAC lo adaptá su strategia di supervishon i ehekushon di multa. En prinsipio FTAC ta enkurashá empresanan ku di manera boluntario adaptá nan mes na e reglanan di kompetensia. Pero mas i mas lo bai konta, prinsipalmente ora ta trata di violashonnan grave, ku FTAC lo bai apliká un multa.
FTAC ta hasi un yamada na tur siudadano ku tin un señal di posibel violashon di e reglanan di kompetensia, manera por ehèmpel palabrashon di preis, repartishon di merkado i mal uso di poder ekonómiko, pa mèldu esaki na FTAC. Pa esaki por hasi uso di e formulario pa keho riba e wèpsait di FTAC. Por mèldu señalnan tokante violashon di reglanan di kompetensia di forma anónimo tambe.
Bo ta interesá den risibí mas informashon? Tuma kontakto ku FTAC na: e-mail: info@ftac.cw, telefòn: +5999 461 00 67.