Fair Trade Authority Curacao (FTAC) a terminá den 2018 kuater violashon di e Ordenansa Nashonal enkuanto Kompetensia. Esei ta poné den su relato anual 2018 ku resientemente a keda publiká.
E violashonnan a keda kometé dor di e asosiashon di arkitekto i ingeniero, esun di dòktòrnan di kas i esun di spesialistanan. E dekretonan den kua e violashonnan aki a keda komprobá ta publiká riba e wèpsait di FTAC. E di kuater violashon ta di un asosiashon den sektor finansiero i riba término kòrtiku FTAC lo publiká e dekreto aki tambe.
FTAC por a terminá e violashonnan menshoná sin ku a imponé un but. FTAC ta splika den su relato anual ku den 2018 el a duna preferensia na guia i kambio boluntario di komportashon. Empresa i asosiashon di empresarionan mester a duna klaridat si den nan operashon i koperá pa adaptá nan komportashon sigun e reglanan di kompetensia kaminda ta nesesario. FTAC por tuma medida, por ehèmpel imponé un but, riba empresa i asosiashon di empresarionan ku no aserka FTAC boluntariamente òf no koperá. Den su agènda pa 2019 FTAC a informá ku su strategia di supervishon ta bai bira mas rígido, prinsipalmente ora ta trata di violashonnan grave [hardcore overtreding], FTAC lo no duda pa imponé un but si ta nesesario.
De su relato anual FTAC ta mustra tambe riba su tarea pa duna Gobièrnu konseho tokante regulashon di merkado ku por tin komo konsekuensia limitashon di kompetensia. FTAC ta risibí hopi señal tokante esaki di komunidat. FTAC ta menshoná ehèmpelnan manera e regulashon di preis i oferta antikuá. FTAC no ta boga pa eliminá regulashon, pero ta mustra si riba e rísiko i desbentahanan ku ta oumentá si no adaptá regulashon regularmente na desaroyonan den merkado. FTAC ta konsehá pa:
- hasi un análisis di e meta i efektividat di reglanan eksistente;
- evaluá e base pa regulashon di preis; i
- pa ta transparente den ehekushon di esakinan.
FTAC ta aploudí ku den 2018 e Dekreto Nashonal ku reglanan pa Destaho Públiko a drenta na vigor. Reglanan pa destaho públiko ta sòru pa un level playing field pa empresanan ku inskribí pa enkargonan di Gobièrnu. Sinembargo FTAC a risibí señal ku ministerionan frekuentemente ta desviá di e reglanan pa destaho vigente. FTAC ta boga pa mas transparensia na momento di desviashon di e reglanan, pa asina públikamente por duna kuenta i rason di esaki. Desviashon di e reglanan pa destaho lo mester tuma lugá solamente den sirkunstansianan eksepshonal.
Por último FTAC ta responsabilisá su maneho finansiero den su relato anual pa su aktividatnan ehersé den 2018. E organisashon a mantené su mes na su presupuesto i a risibí un aprobashon di accountant pa maneho finansiero hibá den 2018.
Por haña e relato anual di FTAC riba e wèpsait: www.ftac.cw.
Bo tin pregunta? Tuma kontakto ku FTAC na Email: info@ftac.cw, telefòn: +5999 461 00 67