Fair Trade Authority Curaçao (FTAC) i Fundashon pa Konsumidó (FpK) a sera un akuerdo di koperashon. E akuerdo aki ta hasi posibel pa FpK por entrega keho di konsumidónan tokante kompetensia inhustu na FTAC. Tambe FTAC i FpK huntu por bai duna informashon entre otro riba e reglanan nobo di kompetensia.
FTAC a wòrdu instituí a base di e Ordenansa Nashonal enkuanto Kompetensia pa supervisá i enforsá den tur sektor ekonómiko di Kòrsou e reglanan di kompetensia liber. FTAC ta aktua kontra empresanan ku ta stroba, limitá o falsifiká kompetensia hustu. E reglanan nobo den e Ordenansa enkuanto kompetensia ta vigente for di 1 sèptèmber 2017.
FpK a keda fundá na aña 1975 komo un organisashon independiente, liber di afiliashon polítiko òf religioso, pa representá interes di konsumidónan di Kòrsou den tur sentido. E ophetivo ta pa logra un posishon hurídiko, ekonómiko i sosial di pleno derechi pa e konsumidó. No opstante ku pa FpK eskoho propio di e konsumidó ta para sentral, tambe ta pone atenshon na konsientisashon di e konsumidó tokante konsekuensianan sosial di konsumo partikular i kolektivo.
Den e akuerdo di koperashon a fiha palabrashonnan tokante aktividatnan konhunto pa duna informashon tokante e reglanan di kompetensia hustu i entrega di keho di konsumidónan tokante problemanan di kompetensia inhustu na FTAC.
Presidente di FTAC Alberto ‘Chos’ Romero: “nos ta supervisá e reglanan di kompetensia hustu pa benefisio di e konsumidó. P’esei ta mas ku lógiko pa sera un akuerdo di koperashon ku e representante di interes di e konsumidó. Dor di duna informashon huntu i risibí señalnan tokante problemanan di kompetensia inhustu di FpK nos supervishon por bira mas efektivo.”
Presidente di FpK señora Adria Pieters-Stuart: “komo representante di konsumidónan na Kòrsou, nos ta kontentu di firma e akuerdo aki. Awor ta posibel pa depositá kehonan tokante sospecho di por ehèmpel akuerdonan di preis òf mal uso di poder. I promoshon di kompetensia sano lo ta semper den benefisio di e konsumidó.”
Pa mas informashon tokante e komunikado di prensa aki por tuma kontakto ku señor Marc Marshall (FpK) na +5999 462 6666 òf señora Jeanne Fabian (FTAC) na +5999 461 0067
