Bureau Telecommunicatie en Post (BT&P) i Fair Trade Authority Curaçao (FTAC), dos órgano di supervishon na Kòrsou, a yega na un protokòl di kolaborashon tokante e forma kon nan lo bai interkambiá informashon i konosementu na momentu di ehekushon di nan tareanan.
A base di e Ordenansa Nashonal enkuanto kompetensia FTAC a wòrdu establesé pa supervisá i mantené reglanan di kompetensia liber i hustu den tur sektor ekonómiko na Kòrsou . FTAC ta tuma akshon kontra di kompanianan ku ta stroba, limitá òf falsifiká kompetensia. E reglanan nobo stipulá den e ordenansa enkuanto kompetensia a drenta na vigor entrante 1 di sèptèmber 2017.
BT&P a keda fundá na 1996 danki na e nesesidat pa realisashon di diferente tarea di regulashon, entre otro supervishon riba tereno di telekomunikashon. Desde di e momentu ei e tarea di BT&P a bira mas amplio asumiendo tambe tareanan di regulashon i supervishon riba e tereno di pòst, sektornan di energia i tarifanan di airopuerto regulá. Na e momentu akí tin ahinda mas ampliashon den e tareanan, bou di dje e regulashon ekonómiko di e Sektor di Kuido na Kòrsou.
Aunke e tarea- i outoridatnan di FTAC i BT&P konosé gran diferensia, ta di sumo importansia pa evitá ku na momentu di ehekushon di e tarea- i ourtoridatnan den sektornan komùn, pa surgi kontradikshonnan. Banda di esaki e interkambio di konosementu i informashon, klaro te kaminda esaki hurídikamente ta pèrmití, tambe e meta i efektividat mester prevalesé di parti di tur dos supervisor. E presidente di FTAC, Alberto “Chos” Romero: “Kolaborashon di trabou huntu ku otro órgano di supervishon ta di gran importansia pa FTAC. Dor di kompartí señal i informashon, nos por hasi e supervishon ahinda mas efektivo.”
Ku establesimentu di FTAC, e supervisornan a drenta den kontakto tokante esaki, i ta di e forma ei nan a yega na otro pa asina firma un protokòl di kolaborashon. Den e akuerdo di kolaborashon tin palabrashonnan stipulá entre otro tokante di deliberashon periódikamente i e prosedimentu si dado kaso ta eksistí un pusibel superposishon na momentu di ehekushon di tarea- i outoridatnan.
Klek aki pa e protokòl di kolaborashon.
Pa mas informashon tokante di e Rueda di Prensa akí por tuma kontakto ku señor Edwin Bogert (BT&P) na +(599-9) 463-1700 òf señor Albert Scholten (FTAC) na +(599-9) 461-0067
