Aktual -

Fair Trade Authority Curaçao (FTAC) a publiká un formulario riba su wèpsait www.ftac.cw pa hasi entrega di keho kontra kompetensia inhustu mas fásil. A keda demostrá ku empresanan i konsumidónan tin nesesidat di esaki. Pa medio di e formulario por duna informashon na FTAC di un manera simpel i korekto tokante aktonan prohibí ku ta limitá kompetensia manera palabrashon di preis i mal uso di poder ekonómiko.

Alberto “Chos” Romero, Presidente di FTAC: “ FTAC ta haña importante pa skucha di komunidat kua ta e tipo di problemanan di kompetensia ku ta wòrdu eksperensiá. Di e manera aki FTAC por aktua kontra e problemanan ku mas ta afektá nos konsumidónan i empresanan.”

Tin dos manera pa mèldu un kartel o mal uso di poder ekonómiko na FTAC. Unu ta pa medio di un siñal informal i e otro ta pa medio di entrega di un keho formal.

No tin niun kondishon mará na entrega di un señal informal. Esaki por pasa via di e-mail, yenando e formulario o traha un sita pa pasa na kantor di FTAC. Un siñal por wòrdu entregá di manera anónimo. E otro manera pa mèldu un problema di kompetensia ta pa medio di un keho formal. Bentaha di un keho formal ta ku FTAC ta obligá na tuma un desishon riba e problema di kompetensia ku a wòrdu di mèldu.

E invitashon pa mèldu problemanan di kompetensia ta kuadra ku e meta di FTAC pa involukrá komunidat den su aktividatnan. Resientemente FTAC a tene un konsulta ku stakeholders i e dokumento konsultativo aki a wòrdu publiká pa FTAC haña mas informashon tokante problemanan di kompetensia agudo ku ta biba den komunidat.

Bo ke mas informashon? Tuma kontakto ku sr. Albert Scholten, direktor di FTAC. E-mail: info@ftac.cw, telefòn: +5999 461 00 67.