Ministerio di Desaroyo Ekonómiko (MEO) a pidi Fair Trade Authority Curaçao (FTAC) pa duna konseho riba e pregunta: kiko lo sosodé na momentu ku anulá e preis máksimo di asfalt? E rapòrt di konseho di FTAC, ta indiká na MEO ku no mester anulá e preis máksimo di asfalt pa e próksimo añanan, pero si mester modernisá e método.
Te aña 2015 Asfaltcentrale Curaçao tabata e úniko ku ta produsí asfalt. For di 2015 Aliansa Asfalt Centrale tambe ta aktivo den e merkado akí. Tur dos sentral ta komparabel pa loke ta nan kuota di merkado, struktura di kosto i kapasidat di produkshon. Segun Alberto ‘Chos’ Romero, presidente di FTAC: “yegada di un di dos sentral di asfalt ta nifiká ku a bini espasio pa kompetensia riba e merkado akí. Sinembargo, esaki no ta nifiká ku outomátikamente por papia di sufisiente kompetensia.”
FTAC ta konkluí basá riba nan investigashon ku na e momentunan akí e merkado di asfalt no ta kla pa laga lòs for di e regulashon di preis di asfalt. Un motibu kardinal pa esaki ta ku, aktualmente ta eksistí e riesgo ku e sentralnan di asfalt ta bai sinkronisá nan komportashon di merkado pa kompetí masha poko, òf keda sin kompetí ku otro. Si esaki ta realmente ta e kaso, e ora ei e merkado ta funshoná manera un monopolio. Pues, na momentu ku eventualmente laga lòs for di e regulashon di preis di asfalt, probablemente e preisnan lo subi konsiderabelmente. Sinembargo FTAC ta konsehá pa modernisá e regulashon di preis di asfalt.
E método pa stipulá e preis máksimo di asfalt no a kambia for di aña 1995. Ta stipulá e preis máksimo basá riba e preis di bitumen (breu) i kalksteen (klep). Otro desaroyo manera bahada di demanda pa asfalt, no tin efekto riba kon haltu e preis máksimo ta. Aserka, e método no ta kontené impulso direkto pa un sentral di asfalt produsí na un manera mas inovativo i efisiente.
Na Kòrsou preis di hopi otro produkto i servisio ta regulá, por ehèmpel: sierto komestibel i remedi, tarifa di notario, transporte di persona i seguro di outo WA. Tin biaha e método pa fiha e preis (máksimo), meskos ku den e kaso di asfalt, tin algun desena di aña bieu. Struktura di un merkado por kambia konsiderabelmente, por ehèmpel: pasobra tin mas proveedor aktivo riba merkado, òf pasobra kompania ta ofresé mas variante di e produkto òf servisio. P’esei ta importante revisá regularmente e regulashon eksistente di preis.
Por baha e rapòrt ku e konseho di FTAC i e kuadro di regulashon relashoná ku regulashon di asfalt for di e página wèp di FTAC. Sektor di konstrukshon ta un di e sektornan di prioridat pa FTAC pa aña 2018.
Basá riba e boletin informativo akí, bo ta deseá pa sa mas? Tuma kontakto ku FTAC. E-mail: info@ftac.cw, telefòn: +5999 461 00 67