Notisia di pers -

Riba 12 di yüni 2024, Korte Komun di Hustisia a konfirma ku FTAC tabata korekto den imponé un but di NAf 68.600,- riba Dutch Caribbean Taxi Association (DCTA) pa no koperá ku supervishon di FTAC.

Den 2020, FTAC a risibí indikashon ku por tin palabrashonnan entre empresanan tokante di preis den e merkado di tour  turístiko i servisio di taxi. FTAC a pidi informashon na tur asosiashon di taxi i kompania di tour. Solamentu un asosiashon a ninga koperashon ku FTAC. Esaki a sosodé di un manera struktural. Pa motibu di esaki, FTAC a imponé un but riba e asosiashon aki den 2021. Riba 28 di sèptèmber 2023, Korte di promé instansia ya a konfirma ku FTAC tabata korekto den imponé e but , i awor esaki ta afirmá den e instancia mas haltu. No ta posibel pa apelá e desishon akí.

FTAC i Obligashon di Koperá

Un outoridat di kompetensia ta vital pa un ekonomia chikí manera di Kòrsou. Pa supervisá efektivo, FTAC tin mester di informashon tokante desaroyonan relevante den merkado. E obligashon di koperá ta e instrumento legal pa garantisá ku instansianan manera FTAC por yega na e informashon nesesario pa  hasi supervishon efektivo. Basá riba e obligashon aki, tur —sea un persona natural òf un entidat legal—mester duna informashon i duna akseso na dokumentonan ora FTAC pidi esaki na nan.

Por lesa e desishon di Korte via e link aki: https://uitspraken.rechtspraak.nl/details?id=ECLI:NL:OGHACMB:2024:78