FTAC a tuma nota di publikashon resien den media, kaminda a sugerí ku FTAC tin e poder pa aktua solamente si empresanan presentá un keho formal na FTAC. FTAC ke usa e oportunidat aki pa aklará nos tareanan i outoridat.
Ordenansa Nashonal enkuanto Kompetensia
For di 1 di sèptèmber 2017, tin reglanan di kompetensia na vigor pa empresanan, segun e Ordenansa Nashonal enkuanto Kompetensia (Landsverordening inzake concurrentie). E lei aki ta prohibí sierto akuerdo ku ta limitá kompetensia entre empresanan, pa medio di e prohibishon di kartel, e prohibishon di abuso di poder ekonómiko, i e obligashon pa notifiká sierto fushon, kompra di empresa of ‘joint venture’. E reglanan ta konta pa tur tipo di empresa lokal o internashonal i asosashon di empresa ku ta realisá aktividatnan ekonómiko den merkadonan di Kòrsou. Aktividat ekonómiko ta enserá tur produkto i/o servisio ku ta keda ofresé riba merkado. Empresanan no ta solamente kompania, pero tambe profeshonnan liber, empresa estatal i sierto fundashonnan.
Kiko ta e ròl di FTAC?
FTAC ta kontrolá kumplimentu ku e regla den e Ordenansa Nashonal enkuanto Kompetensia. Komo un organisashon independiente, FTAC ta kontrolá si e prohibishon di kartel, abuso di posishon di poder ekonómiko, i e obligashon pa notifiká un konsentrashon ta wòrdu sigui. Pa esaki, FTAC tin outoridat pa hasi investigashon.
Kua outoridatnan FTAC tin?
FTAC por inisiá un investigashon a base di tep o siñal risibí di komunidat (inkluso den forma anónimo) of riba su mes (ambtshalve) den kuadro di su tarea di kontròl. E por pidi tur dokumento relashoná ku e aktividatnan di un empresa of asosashon di empresa i por hasi un investigashon den e empresa, sin previo aviso. Personanan enbolbí por keda yamá pa wòrdu skuchá. FTAC por hasi tambe un investigashon a base di un keho formal. Un keho formal ta un petishon formal di un interesado pa FTAC investigá un posibel violashon di e lei dor di un otro empresa.
Un keho formal no por ta anónimo, i FTAC tin ku sigui un prosedura ankrá den lei pa trata ku e keho. FTAC por skohe pa no hasi investigashon di un tep, señal o keho formal. Den tal kaso, FTAC tin ku motivá esaki. Riba e wèpsait di FTAC (www.ftac.cw), por haña nos polítika di prioridat, kaminda e kriterionan di evaluashon ta inkluí a base di kua por rechasá un tep, señal o keho. Tambe FTAC por duna konseho na gobièrnu tokante efektonan riba kompetensia di lei o reglanan vigente òf proponé.
Kiko ta e sanshon den kaso di violashon?
Si un empresa no ta sigui e reglanan di e Ordenansa Nashonal enkuanto Kompetensia, FTAC por imponé but o imponé un enkargo mará na but (last onder dwangsom). Multanan por yega te ku XCG 1 mion of si e suma ta mas haltu 10% di e total ingreso anual di e empresa. FTAC tambe por imponé multa na un persona natural.Tur hende tin un obligashon bou di lei di duna koperashon na un investigashon di FTAC. Si un hende duna informashon inkorekto of engañoso, si no kooperá, of si no kumpli ku e obligashon di notifiká un konsentrashon, FTAC por imponé un multa ku tambe por yega te XCG 1 mion.Transparensia i seguridat legal Tur desishon i konseho di FTAC ta públiko i ta keda publiká riba nos wèpsait: www.ftac.cw. Si un persona no ta di akuerdo ku un desishon di FTAC, e por apelá esei òf hasi opheshon.
Bo ke sa mas?
Si bo kier sa kon bo por reportá un posibel violashon di e lei of si bo tin pregunta dor di e komunikado aki, bo por tuma kontakto ku FTAC via e-mail na info@ftac.cw, yamando na 4610067, of bishitá e ofisina di FTAC na Pietermaai 6. Señal, tep, keho i informashon di komunidat tokante posibel violashon ta importante pa efektividat di e lei.