Fair Trade Authority Curaçao (FTAC) i Banko Sentral di Kòrsou i Sint Maarten (CBCS) a hasi palabrashon den un protokòl di kolaborashon, relashoná ku e forma kon nan lo por kompartí informashon i konosementu den ehekushon di nan trabounan.
A instituí FTAC, Basá riba e Ordenansa Nashonal enkuanto Kompetensia, pa supervisá i kaminda ta nesesario sòru pa kumplimentu ku regla relashoná ku kompetensia liber i outéntiko, den tur sektor ekonómiko di Kòrsou. FTAC ta aktua kontra kompania ku ta stroba, limitá òf falsifiká kompetensia.
CBCS, komo supervisor independiente, ta supervisá e sektor finansiero di Kòrsou i St. Maarten, a base di e statuto di Banko Sentral i e Ordenansa di Supervishon basá riba esaki.
A sera e kolaborashon pa interkambio di informashon i kolaborashon na benefisio di e tareanan di supervishon legal. Segun presidente di FTAC Alberto ‘Chos’ Romero: “Nos ta ta kontentu ku despues di a yega na un kolaborashon ku BT&P, awor nos por sera un kolaborashon ku CBCS tambe. Esaki lo ta na benefisio di supervishon i al final pa ekonomia di Kòrsou.”
Konforme direktor ekonómiko finansiero di CBCS José Jardim: “E protokòl di kolaborashon akí ta brinda e posibilidat pa, den bon konsulta, e dos instansianan por ehekutá nan tareanan. Esaki pa CBCS ta di importansia pa ehekushon efisiente di supervishon.”
Den e protokòl di kolaborashon a pone palabrashon entre otro tokante interkambio di informashon, konsulta periódiko i e forma di prosedé den kaso ku tin posibel indikashon di kubrimentu parsial di ehekushon di tarea i hurisdikshon.
E protokòl di kolaborashon ta publiká riba e link aki (na hulandes).
