Notisia di pers -

Resientemente Korte Komun di Hustisia a pronunsia un desishon den un kaso di apelashon ku un asosiashon di taksi a lansa kontra un multa impone pa FTAC pa no koperá ku supervishon di FTAC.

Di kiko e kaso ta trata? 

Den 2020, FTAC a risibí señalnan di posibel akuerdo di preis den e merkadonan pa tour pa turista i servisio di taksi. Akuerdo di preis entre kompetidornan ta semper prohibí bou di e prohibishon di kartel, pasobra esaki semper ta limitá e kompetensia i ta un desbentaha pa e konsumidó. Komo respuèsta na e señalnan, FTAC a pidi informashon di tur asosiashonnan di taksi i kompania di tour. Un asosiashon a rehusá di manera struktural pa koperá ku FTAC. Pa esaki, den 2021 FTAC a impone un multa riba e asosiashon aki. Riba 28 di sèptèmber 2023, Kort di Promé Instansia a kónfirmá ku FTAC a impone e multa de manera korekto, i esaki a wordu kónfirmá resientemente den e korte di mas haltu.

Pakiko koperashon ta obligatorio? 

Pa FTAC por hasi su supervishon efektivamente komo autoridad di kompetensia riba e funshonamentu di merkado, e tin mester informashon tokante desaroyonan relevante den merkado. FTAC por hasi su supervishon efektivamente solamente si negoshinan i individuonan ta koperá ku investigashonnan. E autoridad primario i ménos invasivo di FTAC pa yega na e informashon nesesario ta pa hasi preguntanan na e partidonan relevante den e merkado. FTAC ta hasi esaki mediante un petishon di informashon. Un petishon di informashon ta e instrumèntu legal pa garantisa ku reguladornan manera FTAC por haña e informashon nesesario i veridiko. Esaki ta duna e investigadónan di FTAC e oportunidat pa kumpli ku e tarea asigná na FTAC bou di e Lei di Kompetensia, i asina aktua den interès di e konsumidó.

Pa garantisa e efektividat di e petishon di informashon komo instrumentu, e legislador a inkluí un obligashon di koperashon pa tur hende ku ta kai bou di e Lei di Kompetensia. Esaki ta nifiká ku tanto individuonan komo entidatnan legal tin un obligashon pa kontestá e preguntanan di FTAC kompletamente i ku berdat i pa mustra dokumentonan si pidi esaki. Naturalmente, e obligashon di koperashon ta balansá ku protekshon legal pa e partidanan den merkado. E prinsipionan general di bon gobernashon ta eksigí ku FTAC mester observá prinsipionan di due diligence i proporsionalidat ora e ta hasi uzo di su poder di supervishon. E infrakshon riba e interes individiual no por ta mas grandi ku lo ke ta nesesario pa logra e metanan proponé.

Multa pa no Koperá 

Sin koperashon, no tin supervishon. E obligashon di koperashon ta un piedra angular di e trabou di FTAC. E obligashon di koperashon ta un refleho di e poder di supervishon di FTAC. Sin esaki, FTAC lo ta inkapasita komo reguladó i no por trata efektivamente ku posibel violashon di e Lei di Kompetensia.

E obligashon di koperashon ta di tal importansia ku e legislador a inkluí provishonan den e Lei di Kompetensia ku ta permití ku FTAC por impone direktamente un multa pa violashon di esaki. E multa por yega te NAf. 1 millón pa individuonan of 1% di e benta di un kompania. Desde su establesimentu, FTAC a invertí hopi tempu i energia den informá empresarionan tokante di e Lei di Kompetensia, inkluso e obligashon di koperashon. FTAC lo kontinua aktuando firmemente i impone multanan riba empresario ku ta trata di evitá e supervishon di FTAC dor di no koperá. Empresarionan mester realisá ku nan tin ku tuma e petishon di informashon di FTAC seriamente. FTAC ta manda un petishon di informashon pasobra e informashon pidi ta esensial pa efektua su tarea di supervishon. E tarea aki finalment ta dirigi pa kontribuí na progreso ekonómiko i bienestar di konsumidó.