Sindikato Uní di Shofùr di Taksi (SINUSTA) ta terminá un palabrashon di preis kolektivo pa transporte for di aeropuerto bou di su miembresia despues di intervenshon di FTAC.
Tarifanan di taksi na Kòrsou ta regulá dor di Gobièrnu. E tarifanan regulá aki ta tarifanan máksimo. Esaki ta nifiká ku no ta permití pa shofùrnan di taksi kobra un kliente un preis mas haltu ku esun fiha pa lei. Pero e shofùrnan di taksi ta liber pa kobra e kliente un preis mas abou si.
Sindikato Uní di Shofùr di Taksi (SINUSTA) ta un sindikato pa shofùrnan di taksi /kargadó di pèrmit pa taksi. SINUSTA a aserka FTAC pa un konsulta tokante aplikashon di e Ordenansa enkuanto Kompetensia den e sektor turístiko. Durante e konsulta aki a bin dilanti ku den SINUSTA tin palabrashonnan kolektivo den kua ta fiha preis pa karedanan di taksi for di – i pa aeropuerto. For di investigashon mas detayá di FTAC a resultá ku e miembresia di SINUSTA di manera kolektivo a fiha e tarifanan aki i ta aplikando nan aktivamente.
E Ordenansa enkuanto Kompetensia den artíkulo 3.1, insiso 2, bou di a, eksplísitamente ta prohibí empresarionan pa hasi palabrashonnan kolektivo di preis den un asosashon. Empresarionan mester, konforme lei, fiha individualmente i independientemente nan propio preis pa nan produkto o servisio.
Di e manera aki ta krea kompetensia i kompetensia ta hiba na preisnan mas favorabel i mihó kalidat i servisio pa e konsumidó. Palabrashonnan kolektivo tokante por ehèmpel preis ta restringí e libertat di eskoho di e konsumidó i ta falsifiká kompetensia. Den merkadonan regulá, manera esun di taksi, tambe kompetensia ta posibel, paso kada shofùr di taksi ta liber ta kobra e kliente un tarifa mas abou. Pero tarifanan fihá den un asosashon, anke ta tarifanan mas abou di loke lei ta preskribí, tòg ta falsifiká kompetensia i esaki ta en pugna ku e Ordenansa enkuanto Kompetensia. E preis posiblemente lo por tabata ainda mas abou sin tal palabrashon di preis.
P’esei ora FTAC a konstatá e palabrashon di preis a instruí SINUSTA inmediatamente pa terminá esaki. E direktiva mesora a mustra disponibilidat pa aktua konforme e instrukshonnan di FTAC. A informá e miembresia di SINUSTA inmediatamente por eskrito di e nesesidat pa para e palabrashon kolektivo di preis. A hasi kla na e miembresia ku di awor en adelante kada persona riba su mes mester fiha su tarifa si e tin e intenshon di desviá di e tarifa máksimo ku Gobièrnu a fiha. SINUSTA a pone tambe un komunikado den prensa i riba su página di media sosial.
FTAC a konkluí den su dekreto ku e desishon di SINUSTA i su miembronan pa kolektivamente fiha tarifanan ku ta desviá for di e tarifanan máksimo pa aeropuerto manera fiha pa Gobièrnu ta en pugna ku e prohibishon pa formashon di kartel konforme artíkulo 3.1 di e Ordenansa enkuanto Kompetensia.
Konsiderando e sirkunstansianan spesífiko di e kaso aki FTAC a haña un terminashon informal esun mas apropiá i no ta haña medida adishonal nesesario.
FTAC ta keda mónitòr e palabrashon ku SINUSTA i por imponé un multa na SINUSTA i su miembresia si nan no mantené nan mes na e palabrashon.
E dekreto kompleto ta aksesibel riba e wèpsait di FTAC: www.ftac.cw.
Bo tin pregunta despues di a lesa e komunikado aki? Tuma kontakto via email: info@ftac.cw o telefòn: +5999 461 00 67