Fair Trade Authority Curaçao (FTAC), departamento di Organisashon Atministrativo i Kontrol Interno (AO/IC) di Ministerio di Finansa, i departamento di Legislashon i Asuntunan Hurídiko (WJZ) di Ministerio di Asuntunan General a pone man huntu pa konhunto duna tayer na empleado públiko tokante regla di destaho.
Gobièrnu konosé for di 23 di yanüari 2018, den forma di e Dekreto Gubernamental Regla di Destaho (P.B. 2018, no. 9), regla nobo relashoná ku destaho. Ku asentuashon di su reglanan di destaho, gobièrnu ke stimulá e proseso di kompetensia na destaho di gobièrnu. Gobièrnu ta un di e dunadónan di trabou di mas grandi ora ta trata di destaho. Tur aña ta gasta miónes di florin di komunidat na por ehèmpel trahamentu i mantenshon di kaminda òf skol, òf na kompra di material pa skol i/òf kantor.
Gobièrnu ta boga pa un destaho hustu i dunamentu di trabou na e empresa ku ta ofresé den komparashon e mihó preis/kalidat. Maneho di gobièrnu ta pa stimulá esaki pa medio di kompetensia entre e empresanan ku inskribí. Pa un proseso di destaho optimal ta di importansia pa e empleadonan públiko ku ta embolbí den e destaho ta bon na altura di e reglanan di destaho i kompetensia.
FTAC ta para pa promoshon di kompetensia hustu na Kòrsou. Mas kompetensia ta kondusí na kresementu di ekonomia, kupo di trabou, preis mas abou i mihó kalidat di produkto i servisio pa komunidat di Kòrsou. Kompetensia inhustu por konsistí di por ehèmpel palabrashon entre kompania na destaho públiko; manera palabrashon entre esnan ku ta inskribí, tokante ken “por gana” un asignashon. Tambe ta yama esaki bid rigging. Pa medio di tal palabrashon ilegal, gobièrnu ta paga demasiado sèn na destaho, i al final ta e konsumidó komo pagadó di impuesto ta esun ku ta keda perhudiká. Den e tayernan FTAC lo splika kon empleado públiko di e servisio ku tin e destaho por rekonosé palabrashonnan ilegal na destaho. E empleadonan públiko por mèldu señal di palabrashon ilegal na FTAC, di manera ku FTAC por investigá palabrashon ilegal, i but e partidonan ku ta hasi nan mes kulpabel na esaki.
FTAC, WJZ en AO/IC huntu ku e empleadonan públiko di e tayer, ta informá tokante e reglanan nobo relashoná ku destaho i lo duna guia práktiko di manera ku e empleadonan públiko por rekonosé palabrashon pa formashon di kartel mas lihé. E tayernan ta tuma lugá durante di e periodo di 28 di novèmber 2018 te 30 di yanüari 2019. Mas o ménos 90 empleado públiko por partisipá na e tayernan akí.
Voor meer informatie over dit persbericht kunt u contact opnemen met mevrouw Jeanne Fabian (FTAC) op +(599-9) 461-0067
