Bo empresa ta enbolbí den un fushon, tuma over òf un joint venture? For di 1 di sèptèmber 2017, lo por ta posibel ku bo mester mèldu e ‘konsentrashon’ akí adelantá na FTAC. Esaki ta reglá den artíkulo 5.2 di e Ordenansa Nashonal enkuanto Kompetensia. Riba e página akí bo ta lesa mas tokante e obligashon di mèldu pa konsentrashon. Tambe tin un foyeto disponibel (na hulandes) ku ta trata tokante obligashon di mèldu pa fushon òf tuma over.

Pa ken e obligashon di mèldu pa konsentrashon ta aplikabel?

E obligashon di mèldu pa konsentrashon ta aplikabel pa tur empresa nashonal i internashonal ku ta realisá aktividatnan ekonómiko na Kòrsou. Aktividat ekonómiko por konsistí di ofresementu di produkto i/òf servisio riba merkado dor di empresanan. Nan no ta solamente empresa komun, sino tambe, por ehèmpel, praktikante profeshonal independiente, e empresanan di gobièrnu [overheids-NV] i algun fundashonnan.

Kua konsentrashon mi mester mèldu na FTAC?

No tur konsentrashon mester wòrdu di mèldu serka FTAC. E obligashon di mèldu ta solamente aplikabel riba konsentrashonnan relativamente grandi na Kòrsou. Bo tin di mèldu e konsentrashon, si un di e situashonnan akí bou ta aplikabel:

  1. e volúmen di kompra i benta kolektivo di e empresanan enbolbí ta resultá minimalmente 125 mion florin antiano den e aña kalendario anterior. Banda di esei, por lo ménos dos di e empresanan enbolbí ta optené un volúmen di komersio anual di por lo ménos 15 mion florin antiano na Kòrsou; ÒF
  2. e empresanan konserní ta krea òf fortifiká huntu un akshon di merkado di por lo ménos 30% den un òf mas ‘merkado relevante’ [relevante markten] na Kòrsou. Den e foyeto akí (na hulandes) bo por lesa over di kiko ta un merkado relevante.

E konsentrashon mester ta sufisientemente konkreto, promé ku bo mèldu. Entre e empresanan en kestion mester tin por lo ménos un akuerdo over di e liñanan prinsipal di e konsentrashon. Por ehèmpel, a base di un karta di intenshon.

Di kon tin un obligashon di mèldu pa konsentrashon?

Konsentrashon por kondusí na empresanan ku un posishon di poder i di tal forma na ménos kompetensia na Kòrsou. E obligashon di mèldu ta duna FTAC e oportunidat pa sigui e kreashon òf fortifikashon di posishon di poder di empresanan.

Teniendo un posishon di poder no ta prohibí bou di e Ordenansa Nashonal enkuanto Kompetensia, pero sí e mal uso di dje. Hasiendo mal uso di un posishon di poder òf pa evitá mal uso FTAC por tuma akshon. Mas informashon tokante e materia akí bo por haña den e foyeto tokante e prohibishon òf mal uso di un posishon di poder.

Kua informashon mi tin di duna den kaso di notifikashon di un konsentrashon?

Den kaso di un notifikashon di konsentrashon bo tin ku duna e informashon ku ta wòrdu pidí den e formulario “Notifikashon di un Konsentrashon” (na hulandes).

Tin kosto mará na entrega di keho kontra konsentrashon?

Nò, FTAC no ta kobra pa notifikashon di konsentrashon.