Prohibishon pa forma kartel

For di 1 di sèptèmber 2017 e prohibishon pa forma kartel ta na vigor pa tur empresa na Kòrsou. E prohibishon pa forma kartel ta prohibí palabrashonnan i komportashon, kompetitivo entre empresanan ku ta limitá kompetensia. Banda di esei, desishonnan pa limitá kompetensia di asosiashon di empresarionan ta prohibí. Pa hasi e asuntu mas fásil, e palabra ‘palabrashon’ ta wòrdu usá pa tur loke por kai bou di prohibishon pa forma kartel.

Tantu palabrashonnan horizontal komo vertikal ta prohibí. Un palabrashon horizontal ta un palabrashon entre empresanan ku ta realmente òf potensialmente kompetidó di otro. Un palabrashon vertikal ta un palabrashon entre empresanan ku ta aktivo riba diferente nivel den e kolumna empresarial, manera un palabrashon entre un produktor i un komersiante por mayor.

Tambe tin eksklushon riba e prohibishon pa forma kartel. Riba e página aki bo por lesa mas over di e prohibishon pa forma kartel i e eksepshonnan vigente.

Palabrashonnan ku ta limitá kompetensia
E splikashon pa e konsepto ‘palabrashon’ ta amplio. Un palabrashon no nesesariamente mester ta pará riba papel i por ta informal òf tásito. Por ehèmpel, un akuerdo verbal. Un palabrashon ta eksihí solamente akuerdo di konsenso enkuantoe komportashon komersial di e empresanan enbolbí. E konsepto ‘komportashon real mutuamente sintonisá’ ta mas amplio. Ta trata di un komportashon real mutuamente sintonisá ora kompetidónan (potensial) kompartí informashon komersial ku otro i seguidamente ahustá nan komportashon di merkado segun e informashon ei.

Violashonnan grave
Artíkulo 3.1, insiso 2, di e Ordenansa Nashonal enkuanto Kompetensia, ta kontené diferente tipo di palabrashon ku semper ta bai kontra di e prohibishon pa forma kartel. E infrakshonnangrave aki ta okashoná dañonan grandi na bienestar di e konsumidó. E siguiente tipo di palabrashonnan entre kompetidónan ta wòrdu konsiderá komo infrakshonnangrave:

fiha preis di benta òf otro kondishonnan di benta;
fiha preisnan di destaho òf otro kondishonnan di oferta di destaho;
limitashon òf kontròl di produkshon òf benta, kual ta inkluí ningamentu konhuntu pa deal; òf
repartishon di merkado, manera kliente òf regionnan.

FTAC ta duna prioridat haltu na lokalisá i eliminá e tipo di palabrashonnan aki.

Eksepshonnan riba e prohibishon pa forma kartel
En prinsipio Ordenansa Nashonal enkuanto Kompetensia, no ta hasi eksepshon pa violashonnan grave. Pa otro tipo di palabrashon e prohibishon pa forma kartel ta duna di konosé e siguiente tres eksepshonnan:

Bagatèl – E prohibishon pa forma kartel no ta konta si e akshon di merkado di e empresanan konserní ta ménos ku 30%;
Eksonerashon di e prohibishon pa forma kartel – Tin ora palabrashonnan por kontribuí di forma positivo nadesaroyo ekonómiko di Kòrsou si e bentahanan ta produsí mas benefisio ku e limitashon di e kompetensia. Empresanan ku a hasi palabrashonnan similar, por hasi un petishon serka FTAC pa eksonerashon di prohibishon pa forma kartel. E empresanan mester por demonstrá ku nan ta kumpli ku kuater kondishon akumulativo. Bo por hasi petishon pa eksonerashon di prohibishon pa forma kartel dor di yena e formulario di petishon pa eksonerashon di prohibishon pa forma kartel.
Eksonerashon pa grupo – Un eksonerashon pa grupo ta kontené ku, pa medio di dekreto gubernamental [landsbesluit], sierto kategoria di palabrashonnan ku ta limitá kompetensia ta wòrdu eksonerá di e prohibishon pa forma kartel. E mester trata di kategoria di palabrashonnan ku generalmente ta generá mas bentaha ku desbentaha. Esei ta e kaso si kumpli ku tur kuater kondishon ku ta aplikabel pa haña dispensashon pa un eksonerashon. Na e momentu aki, ainda eksonerashon pa grupo no ta aplikabel.