Un investigashon resien di Fair Trade Authority Curacao (FTAC) ta tira lus riba desaroyo di preis i e dinámika interno den e sektor di komestibel na Kòrsou. FTAC a inisiá e investigashon pa motibu di prekupashon di konsumidónan tokante e subida di preis di komestibel. E meta di e estudio aki ta pa FTAC por a haña un bista mas profundu di e sektor di komestibel. E investigashon tambe ta un fuente di informashon pa formuladónan di maneho, ya ku e ta duna mas klaridat riba e struktura kompliká di merkado aki i e impakto di regulashonnan ku aktualmente ta na vigor. FTAC ta spera ku e resultadonan di e estudio aki ta stimulá mas dinámika i kompetensia den e sektor pa asina e konsumidó por benefisiá di preis hustu i un merkado ku ta funshoná di un manera sano.
Na Kòrsou, e sektor di komestibel ta karakterisá pa un dependensia hopi haltu riba importashon di produkto. Solamente un 10% di komestibel ta produsí lokalmente. E dependensia haltu riba importashon ta kontribuí na variashon di preis i vulnerabilidat kousá pa motibu di faktornaninternashonal. E estudio di FTAC ta mustra ku tin tambe faktornan lokal ku ta kontribuí na e fluktuashon di preis. Un di e resultadonan mas notabel di e investigashon ta ku preis di produkto di komestibel na Kòrsou a subi mas lihé ku esnan di mayoria di partnernan komersial di Kòrsou, spesialmente den kategoria di batata, bèrdura i fruta. E preisnan aki a subi ku kasi 400% for di 2010. Esaki ta un oumento signifikativo, mas haltu ku e otro islanan den Karibe manera Aruba, di kua nan kondishonnan di merkado ta komparabel ku esun di nos.
Regulashonnan ku no a wordu renobá i tin biaha kontradiktorio i sierto strukturanan den merkado tambe ta limitá kompetensia. Durante e investigashon, den kua FTAC a konsentrá eksklusivamente riba proveedornan, distribuidornan i rebendedornan lokal grandi i chikí, a deskubrí ku e supermerkadonan grandi tin un posishon masha fuerte i ta uza e poder aki pa negoshi pa logra kondishonnan favorabel, ku ta debilita e posishon di e aktornan mas chikí.
Den kuadro di leinan i regulashon, FTAC, usando e ‘Competition Assessment Toolkit’ di OECD, a identifiká limitashonnan ku ta demotivá negoshinan nobo pa drenta den merkado i ta limitá e kompetensia. Algun di e regulashonnan aki ta inkluí prohibishon di importashon pa sierto produkto, manera bèrdura fresku i webu, i e moratorio riba habrimentu di toko i minimarket nobo.
Pa fortalesé kompetensia i kontrolá e oumento di preis, FTAC ta rekomendá algun akshon. Segun FTAC, mester evaluá i ahusta manehonan existente regularmente pa asina por tene kuenta ku kambionan riba tereno di ekonomia i teknologia. Promé rekomendashon ta pa revisá regulashon di preis aktual. FTAC ta konsehá tambe pa evaluá e moratorio riba habrimentu di minimarket i toko nobo pa fasilitá entrada di negoshinan nobo. Finalmente FTAC ta rekomendá gobiernu pa monitoriá di serka e desaroyonan den e sektor di komestibel i hasi un analisis mas profundo riba e faktornan ku ta kontribuí na e subida di preis ku ta desvia kompará ku esnan di nos partnernan komersial.
A konsekuensia di e resultadonan di e investigashon di sektor aki, FTAC ta planiá pa sigui hasi mas investigashon tokante kontratonan vertikal i preisnan di rekomendashon den e sektor. Ta nesesario hasi un analisis mas profundo pa komprondé miho e interakshon di e aktornan den e sektor i e impakto di esaki riba merkado lokal. FTAC lo duna atenshon spesial na e relashon entre proveedor nan den e parti ariba di e merkado i e klientenan chikí manera toko i minimarket den e parti abou di merkado. Despues di e investigashon ei FTAC lo publiká un guia pa kompanian ku lo splika e
kondishonnan di kontrato vertikal ku ta legalmente permití den e kuadro di e Ordenansa Nashonal enkuanto Kompetensia.
Bo por lesa e rapport kompleto di e investigashon (na Hulandes) riba e website di FTAC. Klik aki pa e rapport.
Durante un bishita di FTAC na Ministerio di Desaroyo Ekonómiko dia 25 di òktober, e Presidente di FTAC, Sra. Miroslava Wedervoort, a presentá e Relato Anual 2023 i e Rapòrt di Investigashon di Sektor di komestibel na e Minister di Desaroyo Ekonómiko a.i. sr. Charles Cooper.