Mal uso di poder ekonómiko

Un empresa ku un posishon di poder [machtspositie] tin un posishon asina fuerte den merkado ku e kompetensia ta debilitá. E posishon di un empresa ku un posishon di poder ta asina fuerte ku e por imponé su boluntat riba kompetidornan, suministradórnan i klientenan. Esaki por kondusí na preisnan mas haltu ku ta nesesario, na kalidat redusí di produkto i servisionan i ménos inovashon. Ademas, mal uso ta limitá de bes en kuando entrada di empresanan nobo. Konsumidó, empresanan i komunidat den su totalidat por wòrdu perhudiká pa e motibu ei.

Pa evitá ku un empresa ku e dominio aki hasi mal uso di su posishon di poder, e prohibishon riba mal uso a wòrdu inkluí den e Ordenansa Nashonal enkuanto Kompetensia ku ta trata kompetensia.

Di kiko un posishon di poder ta konsistí?

Un empresa tin en todo kaso un posishon di poder di tur manera, si su parti di merkado [marktaandeel] ta 60% òf mas. Den kaso di un parti di merkado mas abou, un empresa tambe por tin un posishon di poder. Esei ta dependé entre otro di e forsa di e kompetensia i e posibilidat pa otro empresa pa subi merkado.

Di kiko mal uso di konsistí?

Pa por tin òf krea un posishon di poder riba su mes no ta prohibí. Sinembargo, debí na e posishon hopi fuerte di un empresa ku un posishon di poder, reglanan di mal uso mas estrikto ta na vigor, ku no ta konta pa empresanan sin posishon di poder.

Un empresa por hasi mal uso di su posishon di poder si, por ehèmpel, e:

• prohibí klientenan di hasi nogoshi ku otro suministradórnan (eksklusividat);
• obligá klientenan pa kumpra un produkto deseá den kombinashon ku un otro produkto (koppelverkoop)
• kobra preisnan ekstremadamente haltu;
• mantené kondishonnan di entrega irashonal;
• ekskluí klientenan for di entrega sin ku tin alternativa;
• kobra diferente preis pa prestashon similar ku e meta pa limitá kompetensia;
• temporalmente mantené preisnan ekstremadamente abou pa saka un kompetidor for di merkado (predatory pricing).

Otro formanan di kondukta di merkado dor di un empresa ku un posishon di poder por wòrdu konsiderá posiblemente komo mal uso di poder. Di e manera ei sierto komportashon por forma mal uso si nan tin e mésun efekto ku un prohibishon pa klientenan hasi negoshi ku otro suministradórnan.

Pa ken e prohibishon riba mal uso di un posishon di poder ta konta?

E prohibishon pa mal uso di poder ekonómiko ta konta pa empresanan ku un posishon di poder. Empresanan por ta tur empresa i asosiashonnan nashonal i internashonal di empresanan ku ta ehekutá aktividatnan ekonómiko riba merkado kurasoleño. Aktividatnan ekonómiko por ta eksistí di ofresé produkto i/òf servisionan riba merkado dor di empresanan. Empresanan no ta solamente empresa komun [gemeenschappelijke onderneming], sino tambe, por ehèmpel, profeshonalnan liber, empresanan di gobièrnu i algun fundashon.

Kiko ta e but ora ta trata di un violashon?

FTAC por imponé un instrukshon fiho [bindende aanwijzing] riba empresanan ku un posishon di poder. Un instrukshon fiho no ta un but, pero e ta konsistí di instrukshonnan pa kon un empresa ku un posishon di poder tin ku komportá su mes riba merkado pa prevení mal uso. Un instrukshon fiho por ta, por ehèmpel, un obligashon pa sera un kombenio ku un kliente bou di kondishonnan rasonabel. Den kasonan di urgensia, FTAC por antisipá imponementu di un instrukshon fiho i imponé un medida preventivo [preventieve maatregel].

Ora ta trata di infrakshon di instrukshonnan fiho, FTAC por imponé but te un máksimo di 10% di e ingreso anual di un empresa. E desishonnan (di sanshon) di FTAC ta públiko i ta wòrdu publiká riba e wepsait aki.