Diferensha di opinion ku FTAC

Bo no ta di akuerdo ku un desishon tumá dor di Fair Trade Authority Curaçao? Of bo no ta di akuerdo ku kondukto di un kolaboradó di FTAC? Abou, bo por lesa mas tokante e proseso di opheshon i e regulashon di keho di FTAC.

Mi no ta di akuerdo ku un desishon tumá dor di FTAC

Bo por, si tin sufisiente interes, apelá òf bin ku opheshon kontra e desishon aki. Esaki ta stipulá den e Ordenansa Nashonal di Hurisprudensia Atministrativo [Landsverordening Administratieve Rechtspraak]. Si ta trata di un opheshon, FTAC lo revisá e desishon un biaha mas a base di bo opheshonnan. Ora ta konserní un apelashon, un desishon di FTAC ta wòrdu presentá den Korte di Promé Instansia di Kòrsou.

Un aviso di opheshon por wòrdu presentá dor di un persona konserní denter di seis siman despues di un desishon. Un persona konserní ta un persona legal of individuo ku a wòrdu afektá direktamente i negativamente den su interesnan pa medio di un desishon di FTAC.

Bo aviso di opheshon mester wòrdu presentá por eskrito serka FTAC. Tambe e mester kontené e siguiente informashon:

• fam, nòmbernan i residensia di e persona perhudiká i, si e notifikashon wòrdu entregá dor di un representante outorisá, tambe e fam, nòmbernan i residensia di e representante outorisá;
• un deskripshon bon kla di e desishon kontra kua e aviso di opheshon ta wòrdu di fail;
• e motibunan riba kua e opheshon ta basá, inkluso e interes ku e persona perhudiká tin den e desishon;
• un indikashon di lokual e persona perhudiká ta eksigí;
• e firma dor di e persona perhudiká òf su representante outorisá;
• e adrès residensial di prosesamentu na Kòrsou, si e persona perhudiká no tin lugá di biba na Kòrsou.

Agregá huntu ku e notifikashon di opheshon, si ta posibel, un kopia di e desishon kontra kua bo tin opheshon i e sobrá dokumentunan relashoná ku e desishon.

Despues di a entregá bo notifikashon di opheshon, bo ta risibí un komprobante di resepshon i e sobrá tratamentu ta wòrdu komuniká na bo persona. Bo por wòrdu invitá pa un oudiensia. Denter di kuater luna FTAC ta tuma un desishon riba bo notifikashon di opheshon. E tèrmino aki por wòrdu prolongá ku no mas ku trinta dia. Kontra un desishon riba e aviso di opheshon apelashon ta habrí serka Korte di Promé Instansia di Kòrsou.

FTAC ta sigui na momentu di tratamentu di karta di opheshon e prosedimentu stipulá den artíkulo 54 te 69b LAR. FTAC no tin un komishon di konseho den sentido di artíkulo 70 LAR.

Mi tin un keho tokante komportashon di FTAC of un di e kolaboradó

FTAC ta trata di aktua mas minusioso ku ta posibel. Apesar di esaki si tin keho tokante komportashon di (kualke kolaboradó di) FTAC, por entregá un keho serka e Funshonario di Keho independiente di FTAC. Por entrega keho por eskrito direktamente pa medio di un karta elektróniko na info@ftac.cw, na atenshon di funshonario di keho, òf na:

Fair Trade Authority Curacao, n.a.v. Funshonario di keho
Pietermaai 6
Willemstad, Curaçao

Menshoná den bo keho por eskrito, por lo ménos:

• nòmber i direkshon di e esun ku ta entregá e keho;
• un deskripshon mas kla posibel di e komportashon ku e keho ta dirigí riba dje; i
• e fecha.

Si kumpli ku e kondishonnan pa entrega di keho, e funshonario di keho di FTAC lo atendé bo keho. E funshonario di keho lo interogá bo relashoná ku esaki, i lo duna e direktiva di FTAC un konseho tokante e keho. E direktiva ta tuma un desishon final tokante di e keho, i lo informá bo esaki por eskrito. Tratamentu di bo keho ta konfidensial. Klek akí pa e kompleto regulashon di keho di FTAC.

No mester trata bo keho den kaso ku esaki ta relashoná ku un komportashon:

• ku anteriormente a entregá un keho i a atendé esaki segun e Regulashon di Keho FTAC;
• ku a tuma lugá mas ku seis luna promé ku entrega di e keho;
• kontra di lokual esun ku ta entregá e keho a òf por a entregá un opheshon basá riba Ordenansa Nashonal enkuanto desishon hurídiko atministrativo;
• kontra di lokual esun ku ta entregá e keho por òf lo por presentá un apelashon basá riba Ordenansa Nashonal enkuanto desishon hurídiko atministrativo;
• ku ahuste di e prosedimentu ta òf tabata someté na huisio di un otro instansia hudisial ku esun di un hues atministrativo;
• ku miéntras tantu, ta relashoná ku un investigashon òf persekushon andando riba òrdu di fiskal, òf den kaso ku e komportashon ta forma parti di un investigashon òf persekushon di un echo kastigabel, i relashoná ku e echo akí tin un investigashon andando riba òrdu di fiskal.

Tampoko e funshonario di keho, no mester trata un keho den kaso ku interes di esun ku ta entregá e keho, òf peso di e komportashon ta evidentemente insufisiente.