E asosiashon di spesialistanan di Kòrsou, VMSC, tabatin e intenshon pa kolektivamente subi e tarifanan máksimo pa pashèntnan ku un seguro priva. E palabrashon aki a wòrdu hala aden despues di intervenshon di FTAC.
Spesialistanan ku ta afiliá na VMSC ta ofresé kuido na pashèntnan ku un seguro básiko serka SVB i pashèntnan ku un seguro priva serka un kompania di seguro. E tarifanan pa pashèntnan ku seguro di SVB ta regulá, segun palabrashonnan entre VMSC, SVB i Gobièrnu.
Te ku 2015 e tarifanan pa dòkternan di kas i spesialista pa seguro priva tambe tabata regulá den e dekreto PB 1986,20. For di 2015 e dekreto a wòrdu terminá. Esei ta nifiká ku spesialistanan ta liber pa individualmente stipulá nan mes tarifanan pa pashèntnan ku un seguro priva. Promé di Sèptèmber 2017 e prohibishonnan den e Ordenansa enkuanto Kompetensia a drenta na vigor. Esaki ta nifiká ku bou di e prohibishonnan aki spesialistanan tampoko no ta permití pa kolektivamente hasi palabrashon tokante preis o tarifa pa nan servisio.
Curacao and Bonaire Insurance Asossiation (CBIA) a entregá un keho na FTAC kaminda nan ta mustra FTAC riba e intenshon di e asosiashon di spesialistanan pa subi e tarifanan máksimo pa pashèntnan ku un seguro priva kolektivamente. Despues di un kombersashon ku FTAC, VMSC a disidí di kanselá e palabrashon aki. FTAC a yega na e konklushon ku e desishon di VMSC pa subi e tarifanan máksimo kolektivamente ta kontra di e reglanan di kompetensia. FTAC a disidí di konkluí e kaso di manera informal. FTAC a konsiderá ku un medida manera un multa na e momento aki no ta nesesario. FTAC lo sigui vigilá kumplimentu ku e palabrashon entre FTAC i VMSC. Den kaso ku VMSC no kumpli ku esaki FTAC lo por tuma medidanan i imponé un multa.
Alberto “Chos” Romero: presidente di FTAC: “E reglanan di kompetensia ta wòrdu apliká riba tur negoshi, profeshonnan liber I asosiashonnan di empresarionan ku ta aktivo aki na Kòrsou. FTAC no ta hasi distinshon. Un desishon pa fiha preisnan máksimo kolektivo dor di un asosiashon di empresario ta prohibí bou di e lei di kompetensia si no tin eksepshonnan hasí den lei. Den e kaso aki gobièrnu a hala e regulashon di tarifanan di spesialista pa pashèntnan ku seguro priva aden. Preisnan máksimo o rekomendashon di preis por tin mesun efekto ku imponé preisnan fiho, nan por limitá kompetensia. FTAC ta supervisá violashon di e reglanan di kompetensia, sigur si haña un keho. FTAC ta hasi un apelashon na tur asosiashon di empresario pa stòp ku e komportashon aki I si tin duda pidi konseho na FTAC”.
Por haña e desishon kompleto di FTAC riba nos wèpsait. Klek akí pa e desishon.
FTAC ta supervisá e reglanan di kompetensia hustu ankrá den e Ordenansa enkuanto Kompetensia ku ta na vigor for di sèptèmber 2017, en partikular e prohibishonnan pa formashon di kartel i mal uso di poder ekonómiko. Prohibishon di kartel ta enserá ku negoshinan ku ta kompetí ku otro den mes un merkado no tin mag di hasi palabrashonnan tokante di preis di benta I asosiashonnan di empresario no tin mag di tuma desishonnan pa fiha preisnan kolektivo. E tipo di palabrashonnan aki ta resultá den preisnan haltu pa e konsumidó. FTAC no ta fiha preis. Negoshinan mes tin mag di fiha nan preisnan den merkadonan ku no ta wòrdu regulá dor di Gobièrnu.
Siñalnan tokante di violashon di Ordenansa enkuanto Kompetensia, por wòrdu manda na info@ftac.cw òf por pasa na kantor di FTAC na Pietermaai 6.
Bo ke mas informashon? Tuma kontakto ku info@ftac.cw, telefòn:+5999 461 00 67.